Á síðu Sundskólans Fjörfiska, sem rekinn er af Sundfélagi Akraness, er nú að finna tvö myndbönd sem sýna hvernig starfið þar fer fram.

Heimasíða Sundskólans Fjörfiska

Gullmót KR verður haldið helgina 10.-12. febrúar í 50 m braut í Laugardalslaug. Þetta er jafnframt fyrsta gistimót tímabilsins og verður gist og borðað í Laugalækjarskóla sem er um 100m frá lauginni.

Frá Akranesi fara sundmenn fæddir 2002 og fyrr og okkur vantar duglega fararstjóra til að koma með og halda utan um hópinn. Það er hægt að skipta með sér verkum og bjóða sig fram t.d. frá föstudegi til laugardags annars vegar og frá laugardegi til sunnudags hins vegar.

Hér er hægt að skrá sig í fararstjórn (virkar ekki vel í Internet Explorer). Einnig má senda póst á sundfelag@sundfelag.com.

Á föstudag er keppt í opnum flokki. 13 ára og eldri keppa í hlutum 1, 2, 4 og 5 en 12 ára og yngri synda í hlutum 3 og 6, eftir hádegi á laugardag og sunnudag. Greinar fyrir 10 ára og yngri eru eftir hádegi á sunnudag.

Bárumótið 2012 fór fram í Bjarnalaug í gær og tóku um 50 sundmenn fæddir 2000-2004 þátt.

Keppnin var skemmtileg og mjög gaman að sjá hversu mikið ungu sundmennirnir okkar eru að bæta sig. Þá var keppnin um Bárubikarinn æsispennandi en einungis munaði 6 FINA-stigum* á milli tveggja efstu strákanna og einu FINA-stigi á milli tveggja efstu stelpnanna.

Brynhildur Traustadóttir er Bárumótsmeistari stelpna 2012 og Sindri Andreas Bjarnason er Bárumótsmeistari stráka 2012 og óskum við þeim innilega til hamingju með góðan árangur.

Að móti loknu var keppendum og starfsmönnum boðið í pizzaveislu að Jaðarsbökkum og þar fór einnig fram verðlaunaafhending þar sem Bára, frænka og nafna Báru Daníelsdóttur sem mótið er til minningar um, afhenti bikarana.

Við viljum færa starfsfólki kærar þakkir fyrir aðstoðina og óskum öllum sundmönnum til hamingju með flott mót.

Stjórn og þjálfarar

*FINA-stig eru reiknuð út frá gildandi heimsmetum þar sem heimsmet er 1000 FINA-stig og síðan fækkar stigunum eftir því sem tíminn er lengra frá heimsmeti.

Helgina 20.-22. janúar fór hópur sundmanna frá Sundfélagi Akraness á fyrsta sundmót ársins í Laugardalslaug í Reykjavík. Sundmótið var hluti af Reykjavíkurleikunum og þurftu sundmenn að ná lágmörkum til að geta keppt.

Úrslit frá RIG.

Föstudaginn 27. janúar verður Bárumótið í sundi haldið í Bjarnalaug. Þetta er árlegt innanfélagsmót sem haldið er til minningar um Báru Daníelsdóttur og er fyrir 8-12 ára krakka í Sundfélagi Akraness. 

Allir keppa í 50m skriðsundi og 50m bringusundi og fá í lok móts viðurkenningu fyrir þátttökuna. Einnig verður stigahæsta sundfólkið verðlaunað með Bárubikurunum sem eru farandgripir. Árangurinn er reiknaður út frá stigatöflu FINA, þar sem samanlagður árangur í báðum greinunum gildir.

Þeir sem taka þátt eru allir fæddir 2000-2004 í Selum og C-hópi.

Krakkarnir eiga að mæta kl. 17.15 og keppni hefst kl. 17.30.

Í dag hefjast Reykjavíkurleikarnir 2012 eða RIG eins og þeir eru jafnan kallaðir. Á leikunum er keppt í ýmsum íþróttagreinum.

Sundmótið fer fram í Laugardalslaug í 50 metra braut.

Þetta er fyrsta sundmót ársins og jafnfram fyrsta sundmót tímabilsins í 50 m braut og verður spennandi að fylgjast með árangrinum.

Til að geta keppt á mótinu þarf að ná lágmörkum og sendir Sundfélag Akraness hóp keppenda á mótið.

Þetta er ekki gistimót og því þurfa sundmenn að sjá sjálfir um gott og hollt nesti.

Heimasíða mótsins með úrslitum og fleiri upplýsingum.

Sundkonan Inga Elín Cryer var í gærkvöldi kjörin Íþróttamaður Akraness fyrir árið 2011. Önnur í kjörinu varð karatekona ársins Aðalheiður Rósa Harðardóttir, í þriðja sæti varð Íþróttamaður Akraness undanfarinna ára Valdís Þóra Jónsdóttir úr Golfklúbbnum Leyni.

Þann 10. janúar ætlar C-hópur að selja kleinur.

Allir eru velkomnir að steikja, mæting kl. 16.30 í heimilisfræðistofur Grundaskóla.

Á árinu eru áætlaðar 12 kleinusölur sem skiptast niður á hópana (fólk fær tölvupóst þegar kemur að þeim). Öllum er þó velkomið að mæta og steikja hvenær sem er því stundum hentar tíminn ekki sem ætlaður er viðkomandi hópi og því er hægt að 'standa sína pligt' þegar aðrir hópar selja.

Það má láta Katrínu Leifs vita um þátttöku: katrin@sundfelag.com.

Stjórnin